يا حليل ايام زمان وكتين كنا صغار
[center]حبوبة بترحم ما بتدق
لامعها سير ولا جر شدوق
وكتين نجر نضحك كثير ننقل حجار
حبوبة بترحم ما بتدق
لا معها سير لا جر شدوق
يا ما حفرنا من الشقوق
عقرب كبير ما فيهو خير
نفرح نطير نضحك كثير
ولعب شليل يا حليلو فات
ما كان جري ما كان نشاط
نوار يكورك ويتلخم ولدة السجم ولدة رماد
سرقوا اللحم سرقوا القصب
كتلوا الجداد
ساحات تعربد بالعجاج
دخان يطوف من تحتوا صاج
نلعب نلف نجري ونرف
والحلة يا خوي تترجف
نصطاد شباب شايلين حراب
حاملين تراب
ماهدومنا اوسخ من تراب
بالفوضي داقين الف باب
وتجي الزلال وكلاما مخلوط بالسعال
تجري وتقول تجري وتجول
يا اولادي جفلتوا العجول
ونقوم نجر نعبر حيط ناكل شيط
ندخل تكل من السكن نعمل دقون
ما اصلوا لون ولعب جنون
والليل برد دايرين مسوح
حبوبة نتعشي ونجيك ؟؟
نسمع حجاك ننقد فريك
دايرين نشوف ود النمير
كيف سوي شقاق الهجير
يا حليل حجاك وكتين نقنب يوت معاك
نسرح مع ريش النعام
نقدل مع قدم الحمام
ياباك أم كف ما فيش كلام ما فيش سخف
لمن ننوم ونقع نجاض
ويشيلونا يا ناس للرقاد
ما نومنا في عناقريب عراض
ومشينا للخلوة القبيل ما أكثروا
صوت الفكي البتذكروا
كان سوط مقطرن ليهوا لسنات يلاعبن
جابوا الصبي واتبترو
يا حليل ذكر جوه المسيد
يا حليل رجالا جابا عيد
ما كان مديح تحت الضريح
نوبات ترن ترزم تقول
ناس ليلة جن ناس ليلة جن